企業疫轉勝(一):放 no pay leave 你要知 | 文章 – 滙豐機滙

疫情嚴峻,各地停工停產,生意額大減,個個月出糧唔係辦法,點算好?

疫情嚴峻,各地停工停產,員工工作量大減。

SorryLaw 團隊你好:

疫情嚴峻,停工停產,D同事返工都得返三成工作量,個個月照常出糧,真係頂唔順喎。作為腦細,我可唔可以叫員工唔返工,我出少D糧嘅呢?生意難做,租金又要照交,亂世中做老闆真係好艱難。我都知道員工都要供樓或交租,係哩度想同佢地講聲 sorry。

腦細謹啓

腦細你好:

今年咁嘅環境,明嘅。員工放假,有兩種:

  1. 有薪假期 - 一般僱主會先要求員工「清假」,即係放晒D有薪假先,員工放假唔洗做嘢,而又有糧出。咁樣做僱主無出少咗糧,但好處係嚴峻時期過後,員工唔會放假,保留經濟恢復時嘅生產力。僱主有無權決定員工幾時放有薪假期呢?係有權嘅,根據《僱傭條例》第41AA條,幾時放有薪假係「由僱主經徵詢僱員後決定」。其實根據法例,僱主需要在假期開始前最少14天書面通知員工確認可以放假,不過雙方同意的話通知期可以短D,一般放假、批假安排跟公司內部的員工手冊做就可以。咁如果你公司未有員工手冊,趁現在疫情減產期間,不如著手作做埋啦。

  1. 無薪假期 - 清晒D假後,再放就係 no pay leave。相信腦細都聽到,疫情期間好多公司都叫員工放 no pay。其實,no pay leave 必須僱傭雙方同意,僱主係唔可以逼員工放 no pay 架。 僱主應該向員工解釋公司嘅困難,書面請員工同意邊D日子放 no pay leave,員工要簽返名確認同意。如果員工無同意,出少咗糧俾員工,會變成欠薪。

艱難日子需要僱主同員工同心抗疫、一人行一步渡過哩個經濟寒冬,腦細,祝你同你嘅員工都大步欖過。

以上法律知識由陳維寧律師提供。