【居屋2020】管理費過千蚊同私樓睇齊？買樓前記住留意雜費！ | 文章 – 滙豐機滙

如果大家有細心留意，Roots上會每隔一排就會叮囑各位讀者記住買樓唔係剩係要睇樓價或首期。做業主當中牽涉好多不同的雜費例如印花稅、律師費等等。雖然好多雜費都係屬於一次性，但係管理費就唔同。業主個個月都要俾管理費，其實都係一項不能忽視的日常開支。

財務 · 29 Sep 2020 · 3 mins read

私人樓宇的管理費昂貴已經街知巷聞，早期有新聞報導位於香港島的全新小型單位單幢樓雖然被譽為上車盤不過由於大廈伙數太少每呎管理費要超過$8。大型屋苑嘉亨灣都只不過係$4左右。不過最值得令人留意的係，政府推出的居屋當中涉及的管理費有機會同私人屋苑睇齊。

根據房委會”居屋屋苑的管理費按收回成本的原則計算，以支付每月營運開支總額。每個單位的管理費是根據首名買家簽立公契所分配的管理份數，按比例把屋苑開支總額分攤的方式釐定。這套計算方法乃遵照地政總署法律諮詢及田土轉易處的指引制定。“換句話講，同私人樓宇一樣，越少伙數管理費越貴。

以下例子見到，一般來講規模越大的屋苑，管理費越平。消息指尚文苑平均每呎管理費差不多要4元。

屋苑名稱 大廈／單位數目 建議的管理費（單位／每月）

尚文苑 1/494 1,163元至 1,876元

裕泰苑 2/1,226 638元至 1,324元

旭禾苑 1/830 800 元至 1,265 元

凱德苑 1/814 627 元至 1,175 元

錦暉苑 1/735 637 元至 1,056 元

雍明苑 2/1,395 (第一期) 520元至 1,054元(第一期)

凱樂苑 4 /1,698 (第二期) 565元至 935元

*資料來源：房委會

雖然官方未有公佈即將推出的居屋涉及的管理費，不過以目前所得的資料，火炭彩禾苑和鑽石山啟翔苑因伙數只得約800伙和900伙管理費如無意外應該過千元。同時，管理費應該比馬鞍山錦駿苑（約2,000伙）和粉嶺山麗苑（約3,000伙）貴。