2招提昇幽默感 – 周星馳與吳孟達的搞笑技巧 | 文章 – 滙豐機滙

周星馳與吳孟達的搞笑技巧

故事  ·    ·  3 mins read

周星馳吳孟達

周星馳與吳孟達黃金搞笑組合

相信好多香港人對達叔離世都感到非常婉惜,因為佢除左演技超班,同星爺嘅呢對搞笑組合亦為我哋創下好多經典,絕對係幾代人嘅回憶。呢段時間無論搭車定瞓覺前都不斷重溫其電影片段,發現佢哋嘅默契真係無人能及!作為一個鍾意搞笑嘅高I培訓師 (DISC 行為風格學下次再分享),重溫呢啲經典會心大笑之餘,亦嘗試吸收佢哋嘅搞笑技巧 (當然做得好都真係幾靠天份)同大家分享,知唔知我發現佢地用得最多係咩技巧?係「反差」! 而呢個技巧通常分兩種,我哋都可以試吓借鏡,從而提昇溝通甚至演講時嘅幽默感。

搞笑技巧1- 突如其來嘅逆思維反差

簡單講,就係好正路咁表達一樣嘢,帶著觀眾思緒走而令大家以為係咁,跟住突如其來講或做樣逆向嘅嘢,完全顛覆觀眾諗法同期待,帶出搞笑效果。星爺達叔電影中用呢個技巧多不勝數, <九品芝麻官>中,兩叔姪上京慘遇奸官,被賜食包食到死死吓,星爺問「有為,你見點呀?」達叔一面慘樣地答「我有啲肚餓」。呢一幕相信大家都印象好深。另一個我最鍾意嘅例子就係<逃學威龍2>入面達叔話自己失戀,寄咗幅相俾對方就冇晒回音,星爺話「你咁嘅樣就唔好俾自己幅相人哋啦!」達叔回「係呀!所以我咪寄咗你幅相囉!」呢個技巧用得好,講求兩大關鍵: 鋪陳同反差的timing,前者作用就係引導觀眾諗A,為之後出現的B時營造反差! 第一個例子中,食包前嘅以為遇到幫手點知係奸官,到「被食包」時的音樂加委屈情景,配埋兩個跪低嘔咁滯個慘烈,就係鋪陳,就係呢個時候突然出個「我有啲肚餓」完美演繹反差效果。 大家下次度pitch 時可以試下:

技巧培析: 鋪陳>引導觀眾諗A>適合的時機>突如其來的B

搞笑技巧2- 浮誇表達型式嘅反差

呢一招即係好認真咁講無聊嘢,或者無聊地講認真嘢。個人覺得有時達叔比星爺嘅演繹效果更正,可能因為佢本身外表更成熟有佬味,所以個反差更大。例如<破壞之王>中達叔色演既中國古拳法掌門人,踢星爺入會時話介紹一系列武術班收費「鐵沙掌沿於泗水威力無窮……」原本內容對白認真,跟住加插一路手插熱鍋整親「如於送院途中不治..Oh !」然後同一pattern 重覆四、五次,最後「童叟無欺,係我教學宗旨,事先聲明我收徒弟最緊要睇佢有冇潛質。」又或者係<行運一條龍>中大家每年過年都會講完又講嘅年初四咁嘅樣一幕,將呢個技巧發揮得淋漓盡致! 當然,呢兩個例子是advanced 版,因為當中加入咗唔同搞笑原素,配合埋電影聲色畫去呈現。但係我哋日常溝通或演講亦可以做到,當中有三大關鍵,就係懶係認真嘅表情加扮嚴肅嘅語調配合埋一啲公整用字去講無聊嘢:

技巧培析:
懶係認真嘅表情: 唔笑、瞪大對眼加皺眉
嚴肅語調: 低沉、硬朗加冇尾音
用書面語、成語甚至有文學色彩用字

可能你會問,點解要學幽默技巧?好簡單,因為能夠逗人發笑可以提昇你個人魅力。好似筆者上篇<一句惹怒銷售培訓師的話>提到,好的培訓第一步係吸引觀眾聽落去,而適當運用幽默絕對可以令你溝通技巧或演講技巧升呢! 冇先天幽默唔緊要,試下後天努力囉!

「言」燒爸個人檔案
熱愛培訓事業的80後,推崇棟篤笑式演講風格。喜歡透過言語感染其他人,專長於團隊合作、銷售技巧及個人突破培訓,於上市公司擔任高級經理,曾獲培訓業界獎項。
最初視別人為培訓對象,後來發現自己才是學員。現在人生目標是為兒子立下對生命熱誠的榜樣。

原文連結:2招提昇幽默感 – 周星馳與吳孟達的搞笑技巧

2Be Guru
2Be Guru
2BEGURU
2BEGURU