從Mirror 狂熱看你不得不學的「英雄旅程」故事法 | 文章 – 滙豐機滙

「英雄旅程」故事法
生活  ·    ·  3 mins read

Mirror

作者:「言」燒爸

星戰、少林足球、復仇者聯盟、龍珠、男兒當入樽、全民造星系列(特別係造星3)同埋Mirror 出道到紅爆,有咩共通點? 點解咁好睇? 唔準諗即刻答! 其實以上全部都引人入勝,某程度係有得解。以題目主角為例,除左每個人都可以獨當一面,其實最吸引人係佢哋出道至今嘅各種起跌同埋不斷蛻變,努力追尋夢想卻又偶爾碰釘,不同節目內外不乏「敵人」、「同伴」同「師父」,觀眾好似睇住「佢哋大」。筆者一路follow 就發現佢哋呢個好似真人騷嘅過程好切合「英雄旅程」(Hero’s journey)當中嘅方程式,其實一開頭講的所有電影、漫畫同真人故事都呈現著相似套路。

「英雄旅程」由來

英雄旅程係敘事學比較神話學中一種公式,好多電影或戲劇都採用呢個說故事架構。有傳話人類學家愛德華·伯內特·泰勒爵士(Sir Edward Burnett Tylor)始於18世紀觀察神話故事,發現當中都有類似架構,之後唔同學者陸續推出一啲神話敘事理論,直到神話學家約瑟夫·坎伯(Joseph Campbell)提出英雄旅程公式,有系統地列出不同步驟,甚至好多人都知道星戰導演講過,冇呢個理論就唔會有呢套電影。發展到後期,好多編劇都會採用12步曲去描述故事,你會發現文章一開始提到嘅電影,甚至造星3同Mirror 都係一個活生生例子。

「英雄旅程」12個階段












  1. 平凡世界: 冇咩特別,平常地做平常人
  2. 冒險的召喚: 簡單講,想行出 comfort zone
  3. 接受或拒絕: 簡單講,comfort zone 跳出跳入,可能係自己不足或者事與願遺想放棄
  4. 遇上智者/師父: 遇上啟蒙或指導佢嘅人
  5. 跨越門檻: 終於行出第一步,展開奇妙旅程 (Sor! 最近同阿囝去完迪迪尼)
  6. 試煉、盟友、敵人: 唔駛解釋啦,次序不拘
  7. 最深試煉: 簡稱打大佬
  8. 苦難折磨: 幾經辛苦勝利或者撻Q 衰咗但又唔死得晒
  9. 獎賞: 有歷煉之後得到勁武器/新招或者完勝後得到寶物
  10. 歸返之路 : 可能係打爆機準備回程或者再接再厲打大佬
  11. 復甦: 經歷咁多,個人升呢蛻變或者有新領悟
  12. 帶著萬靈丹歸返: 返去但世界從此唔一樣
  13. 利申: 不同書籍或文章有少許出入但大方句相似
「英雄旅程」啟示

 


呢12階段嘅套路係咪熟口熟面呢? 大家可嘗試逐一對號入座。當然,有人可能話唔係!係因為姜濤好吸引!阿Jer好唱得,Lokman 好跳得….下刪千字而我都認同。不過你又不得不承認正因為佢哋不斷遊走呢12階段甚至不斷循環,令本身有才華嘅佢哋更好睇 (筆者超期待梁祖堯同佢哋套《調教你MIRROR》!) 身邊好多創業或發展理財事業嘅朋友,經常要向客戶、夥伴、招攬對象及同事等說自己或公司嘅成功故事,如果您把自己經歷,花點心思識套用呢個講故事套路,甚至適當配合幽默感(2招提昇幽默感 – 周星馳與吳孟達的搞笑技巧),效果肯定會截然不同!快拎紙筆自己試吓啦!

最後想分享題外話,筆者在資料搜集時睇到句好正: 神話背後的原型,其實反映人類於人生中最本質的渴望,而滿足呢個渴望需求,正係神話、小說、電影甚至真人show永恆的劇本公式,「滿足平凡人在平凡一生中成為不平凡的渴望。」如果你都有渴望「不平凡」都係追夢人。追夢人,加油!

原文:從Mirror 狂熱看你不得不學的「英雄旅程」故事法

2Be Guru
2Be Guru
2BEGURU
2BEGURU