想擴展跨境網購生意 但唔知道物流點配合? | 文章 – 滙豐機滙

而家人人都講網購,要放眼世界市場,新手上路嘅賣家必定會遇到嘅一大難題就係【點樣建立完善快捷嘅物流線📦】,以最迅速時間發貨俾買家!今期小編就攞全球最大網購平台之一Amazon嘅代發貨方法"FBA"(Fulfillment by Amazon),同埋賣家自己搵一般物流公司寄貨俾顧客嚟做個比較。

營銷  ·    ·  3 mins read

Amazon平台代發貨方法"FBA"(Fulfillment by Amazon)

使用FBA,可以將繁雜嘅當地派送物流同埋後勤工作交俾Amazon,為自己節省大量人力、物力同埋財力,幫助你全力拓展全球銷售業務。

FBA其中一個主要優勢係可以向顧客提供Prime快速配送服務。Amazon嘅顧客特别喜歡Prime,因為佢哋大部分已經習慣用Prime嘅免費2日送貨優惠。畢竟Prime用戶係俾錢去享受平台優惠,因此平均嚟講會比非Prime顧客花費更多,而且佢哋都傾向購買Prime産品,結果自然會多咗訂單,間接提高產品喺平台嘅搜索排名。

除此之外,FBA賣家重可以增加赢得Buy Box嘅機率,因為"物流選項"喺平台算法中佔有好重份額,所以FBA listing會被優先考慮!呢個係將自己與競爭對手區分開嘅一種方式。

FBA發貨嘅優勢不言而喻,但賣家亦需要承擔額外費用;例如Amazon會針對使用嘅倉庫空間收取月費。由於要喺Amazon倉備貨,因此亦有可能會面對壓貨問題,導致賣家運營壓力上升。銷售緩慢嘅産品更會收取長期庫存存貨費用。呢類費用係爲咗防止賣家將滯銷庫存運往FBA物流中心,從而佔據寶貴嘅庫存空間。

FBA因為是由Amazon負責,所以非常受顧客喜愛,使用者因此可享有更可靠嘅聲譽,小企業或者無能力自己做配送加客服嘅賣家最能從FBA獲益。

賣家自行搵物流公司發貨俾買家 "FBM" (Fulfillment by Merchant) 

要充分利用好自發貨嘅Amazon賣家,必需選用一個專業可靠嘅物流服務供應商處理跨境發貨及退貨安排。因為跨境物流會遇到嘅問題層出不窮,例如產品被扣喺當地海關數十天、喺長遠嘅路途上產品受到碰撞損毀或者甚至出現違失情況等等,種種原因都會觸發買家要求退貨,除咗直接招致額外成本上升、銷售損失之外,情況出現頻密會受到Amazon警告影響評分表現,無改善者長遠好有可能帳戶會受封鎖!

自發貨賣家可以自由定制包裝,甚至喺包裹入面加上寫俾顧客嘅親筆感謝信,令顧客有更人性化網購經驗。事實上,其中一部分嘅中型到大賣家帳號都會有自發貨團隊。

要做好自發貨,物流就係關鍵。選擇咩渠道發貨,一般要根據產品嘅特性(種類、貨值、尺寸、安全性),顧客特別要求以及所在地、物流預算,加埋淡旺季因素嚟綜合判斷。郵政包裹嘅網絡渠道遍佈全球,比其他物流方式覆蓋面更廣,對於一般跨境中小型賣家而言,呢個通常係第一時間諗到嘅選擇,但係有時亦要考慮到郵局客服未必即時處理到賣家嘅緊急問題,旺季時多人排隊出現爆煲情況等等。

另外,選擇自己發貨俾顧客嘅賣家,最好要為運送所需要時間訂下指標: 

1.  訂單遲發率 Late Shipment Rate (應該少於 < 4%)
訂單遲發率 = 實際發貨日期比預計發貨日期遲嘅訂單數 佔 同期所有自行配送訂單嘅比例
如何做到降低訂單遲發率呢?賣家就要合理預估配送準備時間

2.  訂單有效追蹤率 Order Tracking Rate
訂單有效追蹤率 = 提供物流追蹤信息號碼嘅訂單數 佔 同時期所有自配送訂單嘅比例
賣家要注意必須選擇Amazon平台認可嘅物流渠道 + 物流商,以確保填寫物流追蹤號碼時能夠同平台應對

3.  配送前取消率 Pre-fulfillment Cancellation Rate (應該少於 < 2.5%)
配送前取消率 = 產品送抵前取消訂單數 佔 同時期所有自配送訂單嘅比例

以上指標都可以通過各種系統嘅多重預警機制嚟降低遲發,同埋斷貨缺貨機率;如果備貨時間確實不足,亦可以通過編輯商品屬性去延長配送準備時間。

簡單比較過兩種物流方法,其實無話邊個比較好,最緊要符合自己產品需求。如果想再深入了解,或者想搵專業意見,歡迎搵我哋團隊傾傾~



A4lution Limited
A4lution Limited