Auntie,你個仔好打得 | 文章 – 滙豐機滙

Auntie,你好!我係你個仔Peter間公司嘅老闆,你唔使緊張,雖然疫情嚴峻,Peter唔係被炒,公司仲頂得住。 Auntie,我想同你講,你個仔堅打得!我望住呢個外星人,問點解咁唔同。相信離不開兩個原因:遺傳同家教。anyway,都是伯有的功勞!(當然世伯也有credit!)

Auntie,你好!

我係你個仔Peter間公司嘅老闆,你唔使緊張,雖然疫情嚴峻,Peter唔係被炒,公司仲頂得住。

只不過Peter話我知你明天牛一,唔可以OT,要準時放工同你慶生,我當然OK。我祝你生日快樂,身體康健!亦順便同你講聲唔好意思,公司俾左好多工作Peter做,令你好少機會見到佢。我通常7點走,但差不多每次放工仲見佢留喺公司博殺。

我知道世界上起碼有兩個女人等梗佢放工,係佢女友同auntie 你。我叫過佢早啲走唔好留咁夜。我都知咁講好假,邊個唔想準時放工,但老闆未走唔敢閃。

我好明白每晚等阿仔回來吃飯的心情,啲餸凍晒,翻叮啲魚又腥。等的人會拿好拿面,一路等一路咀咒個腦細,望阿仔轉工…..,我點知?我見到我太太咪知!

肯承擔

記得有一次Peter被客投訴他遲了回覆,查明屬實,我叮佢入房照肺,其實我都唔想,因為Peter從未試過被投訴,但個客由最前線的receptionist炒到經理,再轉燃到我,全世界都通天,我都要扮黑面訓斥幾句,以示紀律。

Peter十分歉咎,say sorry左十數次,但沒有找藉口。後來從同事口中得知,其實是同team同事轉介個case給他,卻沒有講清楚條deadline。但Peter沒有把責任推給他人。我好欣賞他承擔的精神,對於一個九十後的年青人來說,是極難能可貴的資產,回報率肯定高過入生物科技股。

願解難

他處事用心,每次遇到難題,總會自己去解決困難,個客say no、project唔夠budget、contractor 扭計…..,佢都自己赤手空拳去處理。游說下個客、張羅sponsor、冧下個contractor…..,公司的困難問題,放係佢枱面多過放喺我張枱。佢入左公司只不過兩年,已經成個甄子丹咁,一個打十個!

迎挑戰

當開會傾新project,要搵同事跟果時,一問邊個想做,呢個時候總會有一兩個去廁所,兩三個扮覆電話,三四個會話家陣已經好多野要跟,其餘的都低下頭,避免同我有眼神接觸。此時空中會有一隻手舉起,我認得那是Peter嘅手。我未見過咁熱血嘅後生仔,有時我會懷疑他是否地球人!

當然,跟著的兩個禮拜,Peter又會好遲至走!

不計較

Peter在公司的人緣也很好,不是因他靚仔小鮮肉,最重要喺佢唔計較,抵得諗,有次我見到有個同事去蒸餾水機斟水,發現冇水,佢竟然返番埋位,當冇事發生。跟住Peter也出去斟水,他見到個吉樽,二話不說,抬起有幾個啞鈴重的蒸餾水樽去換。平時影印機加紙,printer換炭粉,呢啲冇人認頭的dirty job,一定係Peter去做。

有教養

你個仔高大得嚟又有少少怕醜文青feel,有禮貌,朝早會主動叫人;入lift會hold住道門;同事向他講唔該,佢一定會說唔洗客氣。有熨恤衫,打呔會扣喉鈕,竟然用手帕不用紙巾。再加上佢又熟excel識整電腦,仲聽講拉得一手小提琴,雌雄激素俱備,真係冇得輸。難怪女同事每日都圍住他在轉,我開始為Peter的女友擔心,講笑啫,相信Peter是一個專一有責任感的人。

Auntie,我想同你講,你個仔堅打得!我望住呢個外星人,問點解咁唔同。相信離不開兩個原因:遺傳同家教。anyway,都是伯有的功勞!(當然世伯也有credit!)

不過auntie 有一件事,我唔知應唔應該同你講,昨天我接到Peter的辭職信,佢話有間跨國公司,俾左個唔錯嘅offer。我知道鬥薪酬同package,我地好難鬥。Peter係我地做管理的dream staff,如果佢肯留低,相信不出兩三年,必是公司的no. two,有好大自由度去決定公司的路向和市場策略,成就感肯定大過踎係大公司做中層。

Auntie 我應承你,公司會加多人手,Peter以後唔會遲過7點鐘回家同auntie食飯,或者你今晚可以同佢傾下留低係公司,佢有什麼訴求,即本提出,一切都有商量。

當然,唔使講俾佢知我打過嚟。

Auntie,我代表公司,加埋地球,感激你,生日快樂!