致老闆:最好的公司文化,就是沒有文化 | 文章 – 滙豐機滙

公司文化,是每位老闆都會不經意地在意的問題。文化決定同事狀態,亦決定企業成敗。今次與大家分享一個小故事,講一個小道理。

最近因出席一個商業活動,認識了一家做 AI 的新創公司的 HR Manager,言談之間,對方按奈不住向我吐苦水,說現在請人不單艱難,即使已經聘用了,也有七成新人過不到試用期。而原因,卻不是因為同事能力差……

「唉,Herbert,你知唔知呀」她叫 Judy。

「依家做 HR 好難呀…請人又難,啲新人又成日試用期都未過就話唔做。」Judy 以拿威士忌杯的手勢提起她手上的咖啡,進入「諾士佛臺式吐苦水狀態」。

「點解呀?係咪公司出手低?哈哈」對新認識的朋友,前輩教落要懶幽默,讓人留下深刻印象。

「唔係囉。係咁簡單就好啦。依家啲大學生,出嚟搵工唔係淨係睇錢,仲話要講文化。」Judy 說。「好似上星期遞咗信嗰個 Matthew 咋嘛,佢 UST grad嘅,讀engine,好smart架,完全唔係你諗落讀死書嗰啲 nerds咁嘅款。本來我同佢 line manager 都覺得佢大有前途,點估到佢做咗三個星期就遞信。」

「係咪有新公司請咋?通常學生一畢業都 send 一堆 CV 出去見工,騎牛搵馬心態都正常吖?」

「No! 佢遞信嗰時同我講,覺得公司 culture 好唔適合佢,同佢喺 JobsDB 見到嘅野好唔一樣,所以做得唔開心想走。」Judy 忍唔住皺了一下眉頭,這畫面似曾相識:小三那年大考數學不合格,班主任也是用這副咀臉看著我。

「哦…咁你地喺 JobsDB 寫咗啲咩?可以俾我睇下嘛?」Judy 拿出手機開了 JobsDB ,Job posting 那一頁給我看。

我仔細看著…

What we want from you:


嗯,job requirement 好正路。後面才入戲肉。


Why you should join us?

嘩,睇落好正,完全係 Silicon valley 大科企會提供俾員工嘅perks。 如果句句屬實,在這公司工作簡直就像上天堂,想幾時返就幾時返,班同事又後生又搏命,老闆無架子,仲有 free snacks and drinks,夫復何求?難度現在的 millenials 真的咁唔知足,連上面的 perks 都打動不到他們?

本著科學求真的精神,我決定拿著這份 job description,問問我公司的 HR Ann 姐。Ann 姐和香港人廣泛認識的那位 Ann 姐一樣,都是一位對年輕人有蒸僻…sorry,有精闢看法的人。剛巧我公司要請人,請教她如何留住年青人的心,就最適合。

「Ann 姐,麻煩你。」無論你職位幾高,求人時都要低聲下氣。

「嘩,Herbert 哥,唔敢當喎,有咩貴幹呀?」Ann 姐就是這樣的一個女子。粗豪得來好 friendly的那種。

「想俾你睇下,我上星期去商會個 luncheon 識咗個 HR,佢地話咁樣寫 job description 請唔到人,你俾下意見?淨係睇最底嗰 part 得喇。」

「哦…睇過?Work in a young...」Ann 姐仔細地看,邊看邊竊笑。

「Ann 姐,有咩咁好笑呢?唔係寫得幾好咩?後生仔睇到唔吸引咩?」

「喂,呀哥,呢啲一睇就知呃細路啦,你唔係真係信呀嘛。」俾 Ann 姐咁笑,我有少少谷住。但公司個個做得野嘅同事都是她選拔的,我不得不服。

「咁呢堆 perks 有咩問題呢?」

「嗱,好簡單。work in a young environment 就無問題嘅,後生仔多吖嘛。不過後面嗰句 we celebrate what we do 呢,就有少少問題喇。通常寫得呢句即係話公司同事好proud of 自己做嘅野,會成日自 high囉。咁人地自 high 得,都會要求你 high 埋一份,但係你會唔知有咩咁 high 咁。」聽落有少少似歪理,但又覺得幾好笑,所以我繼續聽落去。

「Encourage creativity 係好事嚟嘅,不過句 never say never 呢,除咗係間公司嘅座右銘,都會係你想推job或者推deadline嗰時,老細會同你講嘅說話囉。」嘩,癡線,真架?我唔係咁架喎。

「Flat company structure 仲要 CEO sits on the same desk喎,即係你老闆,你經理,全世界都會無時無刻望住你做野啦,想蛇去 pantry 吹下水抖抖都俾人望住哂。」

「最尾兩句最攞命呀。」

「Flexible working hours,即係收工都會收 email 收 call,flexible嘛,隨時隨地做得野。如果係咁 chur,公司有波枱有遊戲機又點姐?邊個夠膽玩?」

「Ann 姐,句句都有隱藏意思喎,乜間間公司都係咁嘅咩?定係你諗得太 harsh呀?」

「唔係我 harsh。而係啲新同事入嚟 interview 嘅時候,問佢地點解唔做上一份工,都會多多少少 touch on 公司文化呢啲位。其實我覺得寫呢啲description唔係問題嚟嘅,只係老闆係咪真係做得到呢?係咪有心經營好公司文化呢?寫到自己公司有幾好有幾正,新同事期望高而你又做唔到,咪盞人地做得唔開心。不如少啲理佢地,由得同事自己圍威喂,所謂文化,咪又係一班人自己 build up 出嚟。」聽起來好有道理,咁,我公司的 job description 是如何寫的?

「Ann 姐,可唔可以開返個…」說到一半之際。

「呀,Herbert,唔好意思,唔記得提你今日有個 candidate 嚟見 developer 嘅,依家喺 meeting room 等緊你。」

噢,沒關係,我正常找個年青人談談「公司文化」的問題。

走進會議室,眼前是一位一米八高大隻標準靚仔,整齊西裝,sharp 醒樣。Ann 姐果然無令我失望過。

「Hello,我係 Herbert,多謝你抽時間嚟我地嘅 interview。唔好意思要你等咗咁耐,第一次見面,可唔可以介紹下自己先?」

「Herbert 你好。我叫 Matthew,上年啱啱喺 UST 讀 Engineering 畢業,曾經喺一間 AI 公司做過 Assistant Software Engineer……」