【Digital Marketing新世代:2021年趨勢指南】 | 文章 – 滙豐機滙

時移勢易,想做好marketing必須緊貼市場趨勢。 特別係數碼行銷,當我哋唔了解新科技嘅時候就好容易跟唔上架啦。 小編特登收錄咗2021嘅五大趨勢,即刻睇下啦! #Juicyapp #inboundmarketing #digitalmarketing #MeWe #AI #AR #SEO

營銷  ·    ·  4 mins read

踏入2021年,今年喺數碼營銷(digital marketing)上有好多新嘅趨勢。了解呢啲趨勢對於制定最有效嘅營銷策略至關重要,以下我哋將會提供五大2021年數位營銷嘅大趨勢俾各位從事市場營銷嘅行銷人員參考,希望幫到大家改善喺網上嘅市場推廣活動。

1. 新社交媒體(social media)嘅興起

近年有唔少嘅新興社交媒體(social media)冒起,係內地發明且最近非常流行嘅社交媒體抖音(TikTok)就係例子,由於有硏究指出年輕用戶目前佔該應用程式用戶嘅66%,所以好多想要接觸年輕潛在顧客嘅公司都開始探索呢個平台。不過因為前美國總統特朗普大力封殺呢個社交媒體係美國嘅發展,如果你想要接觸美國地區嘅用戶,呢個平台就未必太適合啦。

同時,相信大家身邊都開始有唔少關注私隱嘅朋友開始喺社交軟件移民,陸續由用Whatsapp轉用Signal、由Facebook轉用到MeWe,後呢個社交平台更值得市場行銷人員注意。自從MeWe推出並且漸漸普及之後,都有唔少嘅討論話佢好可能會取代到Facebook。不過對於中小企,尤其係初創企業嚟講,MeWe嘅出現可能係禍多於福,因為呢個平台無廣告同演算法操控,亦唔會記錄用戶所睇嘅內容,變相令細公司冇咗個重要嘅宣傳渠道。然而,不得不提嘅係 MeWe 嘅群組分得比較清晰,如果善用公開同私人群組功能,繼而發展品牌專頁,其實都有助培養一班忠誠客戶架。

近期比較紅嘅仲有Clubhouse,究竟我哋點樣可以喺呢兩個平台做行銷?等我地一齊再詳細了解下呢個社交媒體移民潮

2. 直播影片及影響者行銷(influencer marketing)日益重要

由於新冠疫情仍然嚴峻,幾乎世界上大部分嘅國家都仲係保持係封鎖狀況。喺大家冇辦法面對面參與實體活動時,直播漸漸成為咗品牌同大家溝通嘅最直接方式。此外,直播嘅時候觀眾亦可以購買商品,對商戶嚟講,直播甚至可以係一個銷售點。

另外,有研究指出依賴意見領袖(Key Opinion Leader)進行宣傳能夠產生比起其他任何數碼營銷策略高11倍嘅投資回報。咁到底點解大家咁熱愛KOL呢?主要因為KOL比普通廣告可以俾人更真誠嘅感覺,亦較容易同潛在客戶建立信任度,所以透過KOL同直播來推廣你嘅品牌產品,成效都會大大提升啦。

3. 人工智能 (AI) 嘅使用將增加

人工智能已經接管咗好多簡單嘅工作,相信未來將會成為全球各個行業嘅核心。例如,喺過去幾年,微軟(Microsoft)同Uber都開始使用機器人巡視停車場同大型室外區域以預防犯罪,機器人可以讀取車牌、匯報可疑活動並收集數據,只要每小時7美元就可以租用呢類機器人,相比起聘用保安所需嘅工資更便宜。

從數碼營銷嘅角度去講,聊天機器人(chatbots)同虛擬助手(virtual assistant)嘅普及將會允許行銷人員以個性化嘅方式與消費者進行實時互動。 Facebook正準備重新啟動虛擬助手,虛擬助手利用語言處理軟件,透過Messenger自然咁回應客戶,並好似真人咁展開對話。根據全球領先嘅信息技術(IT)戰略諮詢、研究同分析嘅跨國公司高德納(Gartner)嘅講法,預期今年可以通過人工智能產生20%嘅業務內容。大家可以想像到,我哋喺網上閱讀嘅每十篇文章入面,有至少兩篇嘅內容係由機器人撰寫嘅。

4. 擴增實境 (AR) 可應用於更有效嘅品牌宣傳策略

AR同VR嘅出現可以提高你營銷策略嘅效果之餘,更可以改善用戶體驗。Gartner又預測,到咗2022年,將會有70%嘅企業會使用沉浸式虛擬實境(VR)技術進行推廣,而且有 25%嘅企業將融入相關技術喺佢哋嘅產品入面。

儘管虛擬實境引起左好大嘅迴響,但從市場營銷嘅角度嚟睇,擴增實境(AR)嘅實用性較強,甚至有專家預測,AR嘅市場份額將繼續超過VR添!越來越多品牌使用AR技術嚟增強消費者體驗,IKEA就推出過一個AR應用程序叫IKEA Place(暫時只有IOS版本),只要用家開啟iPhone鏡頭,就可以預覽放置咗IKEA嘅傢私喺實時背景嘅環境,用家甚至可以移動傢私,並從唔同嘅角度查看成個外觀,以後想知道傢俬適唔適合,就唔洗再憑空想像啦!

唔好以為得家品店先可以咁做,其實時裝品牌H&M都曾經使用AR技術做試身。AR為行銷人員帶嚟無限嘅可能,所以絕對係未來嘅一個大趨勢。


5. SEO新方向:語音及圖片搜尋優化

如果你有睇我地講解集客式行銷,就應該知道SEO有幾重要啦。以往講起搜尋引擎最佳化(Search Engine Optimization),大家都只係會由關鍵字(keywords)着手,但由依家開始要改變呢個手法啦!其實語音同圖片嘅搜尋引擎最佳化都係不容忽視。語音方面,無論是係桌面上面使用聲控嘅AI助手,定係用智能手機嘅語音輸入功能,越來越多嘅用戶都鍾意喺搜索欄中載入語音代替文字。圖片方面,多得Google新推出嘅突破性圖像識別AI演算法Google Lens工具,允許用家直接用圖片搜尋潛在內容。例如,用家可以幫佢哋嘅植物影相,然後上載相片去進行搜索,從而查明植物係咪有毒。呢個趨勢意味住行銷人員除了要留意文字嘅SEO之外,都要開始關注語音同埋圖片嘅搜尋排序。

以上就係五個小編認為頗為重要嘅數碼營銷新趨勢,希望大家今年都可以得心應手地做好線上推廣,達到公司嘅KPI!



JUICYAPP LIMITED
JUICYAPP LIMITED