俾啲掙扎 | 文章 – 滙豐機滙

最近好大隻的胡力威師傅,好大力咁同大家講:俾啲掙扎!熱爆社交平台,配合社會和運動界熱sell的一個訊息:堅持,不放棄。工作上遇到魔鬼老闆、疫境下被放無薪假、與女友關係進入作戰狀態,stay or quit?堅持好痛苦,棄賽好徬徨?好掙扎!

fight for life

與失敗掙扎三個回合

一世人流流長,邊個未試過挫折、失敗、不如意,最快的解決方法莫過如即閃,quit。同「魔鬼老闆」不咬絃,覺得佢搵放大鏡找你的納米錯,唔啱feel,即resign,上晝返工,下晝失蹤,痛快!

從大數據中可以證實「魔鬼老闆」呢類生物,是隨機分派的,即每間公司、或者同一間公司在不同樓層,總會有幾隻,轉去另一公司或崗位,好有可能又會遇上,不是你黑仔,只是或然率的效果。

與其玩快閃,不如學識如何打大佬,學習與「魔鬼老闆」共舞,甚至快樂生活。而且魔鬼唔魔鬼,從無國際定義,只是隨口嗡的一個標籤,你話老細魔鬼,佢都確診你是廢青,終審庭都判定唔到邊個係人,邊個係鬼。不如學下提升自己的戰鬥力,好過walk away!

遇到難題困擾,輪了第一個回合,埋繩角抖抖,回氣,檢討、改良、再戰;輸第二回合,知是一場硬仗,掙扎,再fine tune落敗原因,提升關鍵能力或態度,唔好發爛渣,再抽多一個回合。我建議與失敗對抽三個回合才決勝負,老套講句,失敗是學野最多的時候,雖然有啲公民教育 feel,卻是堅。放棄了,你一世都會輸俾魔鬼。

不過如果對抽三個回合都輸,你要冷靜下來,想想是否自己力已盡。是的話,二話不說,要抽身,改變!因為再糾纏落去,只會輸得更甘,直至冇得翻身。要識得放下,let go,不要連條信心底褲都輸埋,咁你就真正的破產了!

克服一個處境如是,學習一項新技能如是,處理一段關係如是,同自己訂個合約,與失敗掙扎三個回合,然後才華麗轉身!一個人的歷練、智慧、戰鬥力,是這樣練成的。

把問題定過期日

近年喜歡跑山,面對過千的石級、超過50公里的賽道,膝蓋痛、小腿抽、力已盡,少一點堅持和掙扎,就要剪帶(棄賽),返回起點取行李。繼續跑,又痛苦又怕傷到手尾長。工作上遇到不如意,疫境下被放無薪假、與女友關係進入作戰狀態,stay or quit?堅持好痛苦,棄賽好徬徨?好掙扎!

其實所有問題有過期日,正如食物、藥品、搓手液都有expiry date。困擾有限期,不會是天荒地老,就算疫境也總會過去。假設把同老闆關係的問題定一個月為過期日,過期前,問題仍是有效的,把它置於枱面,是你的甲項工程,投放洪荒之力和時間,做解決師。例如分析老細最唔妥你的是能力定態度?可否改善或提升?請教以前同佢合作過的幸存者,有什麼survival skills?

盡最大努力去解決,不猶豫,不抱怨,目標為本,問題過期前都要掙扎。好,一個月過去,做個檢討,若果同老闆關係改善,佢開始俾番啲like你,你也知如何做得中他老人家心意,mission completed,出部貴手機作自我獎勵。

若不幸問題依舊或更惡劣,你經一輪掙扎努力都係無成果的話,算,要了斷,cut loss,一係quit (如果有機會),一係接受你暫時沒有能力解決這個問題,一段時間內你唔會有機會上位,會有紅圈,預左硬啃老細幾個白眼。總之這個問題已過期,要落畫,你的時間和精力轉去解決另一問題或尋找新機會。

戰鬥過、俾過掙扎,不要浪擲青春,一係接受,一係改變,兩個只能活一個!總之唔好發爛渣,(已第二次提你),又唔接受,又唔肯改變,胡力威師傅會出嚟同你掙扎下,驚未!