與問題保持距離 - 世界無限大 | 文章 – 滙豐機滙

一世人流流長,總會遇上林林種種、大大小小的問題或挫折,俾人飛、考試月巴左、俾老闆反日眼、班friend出街冇call你…..,若把問題放得太埋眼睛,會阻擋你的視野,你看見全世界都是黑色的。

借用叮噹 (我不是多啦A夢的一代) 的隨意門,回到兩個兒子4、5歲的日子,地點是玩具反X城。父母最愛在此把孩子放生,因為兩老就可以自由自在,去其他店舖購物睇傢俬同嘆杯咖啡,難得偷來的半小時,不過當然首先要和小朋友簽妥合約。

「今日要趕住返屋企煮飯,睇半個鐘頭就要走,O唔OK?」他們當然OK,因為他們沒有時間觀念。

「夠鐘,要走啦。」30分鐘到,第一次吹雞。

「未睇完,睇多陣啦。」

「好,最後10分鐘,一定要走。」一早預了要有buffer位。

「10分鐘到,真係要走啦。」第二次吹雞。

「未得呀,仲有高達未睇呀。」

已經寬容了一次,但他們竟然不守承諾撤退,更不知對父母來說回家煮飯是何等重要的甲項工程!

父母開始有火,嘗試用最低武力,捉著他們的手臂拖著離開。但小朋友不是和理非,他們會使用大殺傷力武器 - 大哭尖叫「螺地」四輪朝天,呢個位會極度刺激父母 - 「天呀,我前世是否打劫過銀行!」,令兩老變成勇武,引發情緒核爆,最終可能以武力清場。

由持份者變身解決師

面對令人會動氣的困難處境,我會嘗試踏後兩步 (因一步都未夠),站遠了,你再不是持份者,只是路人甲,不會被情緒騎劫。距離遠了,你會發現眼前的小朋友,再不是你的兒子,你會好離身咁問:「邊個係佢阿媽嚟㗎?搞到佢咁!」

你見到的是一位與父母拉鋸的小孩,透過他唯一表達方法 - 尖叫「螺地」作為與高牆對抗的雞蛋。其實這些場景,身為父母必經,沒什麼大不了。只要與問題或困局保持一點距離,你會變身成解決師,the man who kills troubles。

解決師會分析目前的處景與自己的關係和終極意義,從而尋找最合適的解決方案。處理小朋友與父母產生衝突,最重要的任務不是令他們服從你的指令,終極意義是令他們學習。在上述的處境中,小朋友有兩項重要的學習:第一是信守承諾,應允了的要切實執行;第二是學識表達意見,用語言、理據,不是用情緒、威嚇。

如果令小朋友學習是終極意義,父母不用核爆,只需平心靜氣向小朋友說:「你地頭先應承左睇多10分鐘就走,要跟番做,如果想睇耐啲,要同我商量,唔係大叫同螺地。好,企番起身先,衣家同我講,你地想點樣?」

令小朋友學識表達、控制情緒,相信比回家煮飯更加重要,是解決師的視野!

與問題保持距離,世界冇限大

一世人流流長,總會遇上林林種種、大大小小的問題或挫折,俾人飛、考試月巴左、俾老闆反日眼、班friend出街冇call你…..,若把問題放得太埋眼睛,會阻擋你的視野,你看見全世界都是黑色的。要懂得與問題保持距離,站後了,問題開始變細,再站後點,問題變得更細。


你的視野變得更闊,見到更大的世界、更多的可能性,包括:

1) 問題的大環境 – 思考問題的終極意義和目的,不固執小節,浪費精力和時間。趕回家煮餐飯不是終極目的,教育小朋友控制情緒更有意義。

2) 問題對你的意義 – 值唔值得付上高昂的代價?是不是自己應該追求?你甘願做兵,有否想過女神瑪莉是你最合適的伴侶嗎?還是你只想得到一個trophy girl。

3) 自己的責任 – 近日股市大趺,看似自己冇嘢可以做到,但如果花多點時間跟貼個市,或者可以唔駛蝕咁多。

4) 對方的處境 - 老闆壓迫你交貨,卒份野卒到紙都穿,但佢亦都可能俾佢嘅大方丈欺壓緊,佢自己都硬啃左7成。你家陣係唔係開心番少少呢?

5) 其他選擇/機會 - 買唔起iphone 11 pro,暫時用住iphone SE plus甚至 小米Max 3 都OK。

6) 問題影響你幾大 - 唔like份工或者份工唔like你,返工灰爆,但放工就係自己的主人,有自己的生活,你個仔仍然好cute,隻狗仍擺尾歡迎你回家 

7) 問題會過期 - 鳳梨罐頭都有到期的一天,困擾你的問題也會有過期日,除了自己的心魔,絕少的問題會跟足你一生一世,邊有咁大舊電呀!

8) 點解唔搵人傾下 - 可以問下經歷問題的過來人,或者搵個願意借出耳朵的friend傾訴下,唔一定有個好堅的答案和advice,但你一定感到鬆好多。

9) 可唔可以暫時放下 - 如果堅係頂唔順,可唔可以暫時放下一天或者半day都好,俾自己回下氣。

在你的世界,確實存在問題困擾,但只是其中一點,不是全部。其他領域,家庭、社交、興趣……等等,都是正常和正面的。你會把問題由10個慘,減到兩三個慘。

你試下行到好埋好埋睇你老闆,你可能覺得佢唔係人!站後了,你發現天下間的老細都差不多,佢只是其中一員,未係十級魔鬼,沒什麼大不了,況且放工之後,佢唔會跟你返屋企,再減多一個慘!