【職場攻守道】辦公室派利是有咩要注意?職場派利是原來有大學問! | 文章 – 滙豐機滙

在職場上,派利是竟然稱得上一門學問,當中定必有其竅妙。

財務  ·    ·  5 mins read


每年新年的經典對白: 年初四咁嘅樣。不過今年有點不同,因為今年打工仔於年初五先需要翻工。

每年新年的經典對白: 年初四咁嘅樣。不過今年有點不同,因為今年打工仔於年初五先需要翻工。

 


恭喜發財,利是逗來!新年利是包含的除了一份祝福,在華人職場上,一封利是更可以代表面子。

如果你係一間比較傳統的公司工作,農曆新年「派利是」分分鐘可以成為一種學問,更可以成為一場「攻防戰」。

不過在職場上,派利是竟然稱得上一門學問,當中定必有其竅妙。新年派利是之時,以下問題有沒有曾在你心中浮現過? 

  • 唔知個位女同事結婚未,派唔派俾佢好?

  • 每封利是金額幾多好?

  • 市傳個位女同事好似搞緊離婚,我應唔應該派俾佢呢?

如果以上問題曾經在你腦海中閃現過,可能以下文章幫到你!

第一個重點: 人地當你係前輩,派!你可以吩咐佢做野,派!

在家庭聚會上,通常是長輩向後輩派利是。在職場上,即使你未結婚,但平日有人當你係前輩,又或是你可以點到佢做野,都一概派咗先。

此重點又可以進一步理解為: 公司年資耐,可以向年資短的同事派。高職級的員工,可以向低職級同事派……如此類推。

第二個重點: 當你個心諗: 派唔派俾佢好呢?派咗先!

緊接上一個重點,如果有一些同事令你猶豫不知道派唔派好,總括來說都係「派咗先」!
正所謂: 禮多人不怪。主動向同事派利是,結果同事唔收封利是可能有少少尷尬。不過如果你怕尷尬唔派,結果人地可能誤會你孤寒唔肯派利是。

20蚊,甚或是50蚊,就可以減少一個誤會,其實都算是一個Fair Deal。如果你表示:其實我不太怕職場同事誤會,那麼你從一開始已不需要閱讀此篇文章,甚或是一封利是都唔派,反正你都不太在乎公司同事看法,可以放膽地在辦公室放飛真我。

「派咗先」此重點進一步可以了解為: 隔離Department 個位唔係好熟,但叫得出名嘅同事:「派咗先」!過去一齊Work過同一個Project嘅同事,新年期間係𨋢口撞到?「派咗先」!


第三個重點: 向唔向「疑似未結婚」的同事派利是好呢?睇定少少先。

總有些同事,每天朝見口晚對面,但你對他的背景一無所知,直接向佢問婚姻狀況又似乎有點奇怪。甚至乎,你同呢位同事好熟悉,知道佢正在跟老公分居、搞離婚。
再常見一點,翻新工初到貴境,你見呢位同事似乎已達適婚年齡,合理推斷該位同事應該係已婚人士,但又不敢肯定。

以上種種情況,令你糾結:究竟我派唔派利是俾佢好呢?

總括而言,你可以跟從第二條重點: 唔知派唔派俾佢呢?派咗先!

但你心底總係有少少搶心會「表錯情」、「派錯利是」,不妨利用辦公室一大規條: 「跟大隊」!人地派,你可以跟住派; 人地唔派,你都唔好派。

第四個重點: 最重要Make Sense 

派利是可以點唔Make Sense?雖然此話真係好似廢話,但職場上他人的sense,的確可以跟你的Sense有好大出入。派錯利是,或是做唔啱手勢,分分鐘令人心中響起一句: 唔好啦! 


 

1) 港資公司,其辦公地點位於香港鰂魚涌,九成同事操流利廣東話,但有老細向員工派人民幣利是。各位打工仔只好安慰自己,可能老闆長期看好人民幣匯率走勢,名符其實「袋錢入你袋」。

2) 熱心環保分子,堅持利用舊公司或行家的利是封。

你的公司過去遭其他機構收購,其名稱、形象、甚至管理層通通都「改朝換代」了數次,但若你堅持「係清朝用明朝的尚方寶劍」,利用「前朝」的利是封,只能說祝你好運。

另一個比較普遍的情況:派行家利是封。打工仔跳糟轉公司是等閒事,不過在新公司仍用舊公司利是封,以為此舉是響應環保。正所謂: 同行如敵國。道理有如你行入Apple Store,但見到推銷員腰間掛住一部SamSung手機,你見到都唔知比咩反應好。

3)傳統習俗搞搞新意思?

現時世代講創意,市面不時會有藍色利是封、綠色利是封。年輕一代對利是封樣式無所謂,不過上一代(好大機會是公司年資較長,職級較你高的同事)可能會認為十分礙眼。
最安全的利是封選擇,是公司當年印刷的利是封; 其次是百家姓利是封或是普通利是封;最後是其他行業出印的利是封(如你從事銀行,但派由Chanel 印出的利是封,這也算是十分得體。)

每封利是派幾多?

如果你是職場小薯仔,每封利是派多少應該不是一個大難題。封十蚊、廿蚊、還是五十蚊,悉隨尊便。如果是公司最大的老闊,這其實也不算是大難題,因為就算你唔派,部下翌日都係要翻工,有什麼不滿意大可另某高就。不過假設你是公司「一人之下、萬人之上」的公司中層,每封利是金額多少就可算是一種藝術了。

從一位職場前輩聽過,他派利是有一大原則,利是金額盡量唔好多過老細。如果大老細向每位同事派500蚊,作為中層就每封派100蚊或是200蚊。如果大老細向員工派200蚊,你可以向員工派100蚊或是50蚊。

雖然以上文列出了好幾個派利是「攻防戰」注意事項,不過農曆新年時期「新正頭」,說到底最重要的都是: 派利是個個開心,逗利是個個又逗得開心,咁先係過節真正意義。


在此,再次祝各位農歷新年快樂,恭喜發財,利是逗來!

商場心理學
商場心理學