唔該你照下MIRROR | 文章 – 滙豐機滙

面對MIRROR,好多男人(特別是中年) 都會低頭或搖頭,內心bubble:「我真係好唔妥你!」其實MIRROR是一塊真的鏡子,你唔妥嘅,係自己。
視野  ·    ·  3 mins read

2021年7月7日,你拖住老婆逛老尖,在天星碼頭她看見那幅慶祝MIRROR成員 Anson Lo 生日的超巨型廣告布幕,即時掩咀尖叫,那雙放著高volt數電量和愛情的眼神,你已多年未曾見過。她拋下了你,忙著影相出post (一齊selfie?你諗多左)。那晚她著你自己買飯盒,她整晚loop住唱「神隊友」,loop 住聽「蒙著嘴說愛你」,而你卻loop住食飯盒。你沒有其他出路,決定加入那個16個字的苦主大聯盟 (我老婆嫁左比Mirror導致婚姻破裂關注組)。

假如你和太太同時看見,誰會先崩潰?

 

面對MIRROR,好多男人(特別是中年) 都會低頭或搖頭,內心bubble:「我真係好唔妥你!」其實MIRROR是一塊真的鏡子,你唔妥嘅,係自己。

總數應該六件的腹部 (參考Edan圖),化為懷有身孕的一個山丘;應該強勁的臂彎,變成弱勢肌群,還有那對未P圖前的黑眼圈。要KO你,不用出Anson、Edan、姜糖呢個級數,求其在跑班搵個上了3個月堂的同學,已可技術性擊倒你。話時話,上次你跑5K以上,或做超過30分鐘心肺運動是幾時嘅事?1,2,3…..,答唔出,即係答左。

是否應立法監管下呢啲post?        (Edan Lui fb)

 

MIRROR,指鏡子,其實是我開始跑步的原因和動力。幾年前的一天我照鏡,見到前面的一名陌生男子,不,是大叔,不,是樣衰的大叔,有齊上面種種特徵 (另加髮線向後移民),感到蒼涼唏噓中帶少少徬徨不安。大叔不能只得愛,而沒有身形。不能只睇歐洲國家盃爆粗,而不落街爆汗;不能鬧人廢青,自己卻左手啤酒右手搖控度日,太不長進了!

MIRROR反映自己,你面對的話,會令人產生焦慮,而大部份改變和踏出舒服區的動力,都是由焦慮帶動。不是老細出言恐嚇你啲report再甩甩漏漏以後就回家自我隔離,你不會細心翻看修改文件。那些有自我實現self actualization 能力的人,根據心理學家Abraham Maslow的研究 (“ A theory of Human Motivation" 1943),只屬於極少數的人。你當住唔係你先,不如照下鏡,產生危機感啦。

我老婆嫁左比Mirror導致婚姻破裂關注組 fb

 

有一天在16個字群組,我見到呢個post,其中引述森美大哥 (咁樣稱呼森美我要衝破不少心理關口) 說:「靚仔係個天俾你,身形係對自己嘅要求」!

我冇fact check是否出自森美大哥 (講多幾次會慢慢接受到) ,anyway,我好認同,雖然未曾做到。有人說,20歲後你的外貌,不關父母親的事,而是你對自己的要求。

男人好女人好,大叔好鮮肉好,外星人好地球人好,做人對自己要有要求。加入跑班,起初我對教練有要求,因為交左學費。然後教練基於同一原因,對我有要求:

阿孫,你10K要做到sub 50。

阿孫你搞乜鬼呢排大左半個碼,唔可以再食炸雞翼。

阿孫,一陣跑圈你要守住,唔好俾E同學界你。

教練的要求慢慢轉化成對自己的要求,繼而變成動力,keep住不放棄。班中亦見證更多不用教練叮嚀,也對自己有要求的同學,他們每天晨咁早起床去跑、jog 斜路、放假去做長課(近日變成了肯亞人),不飲含糖份的飲料,還有那位已年愈60的跑班同學May姐,要求自己今年要完成埋六大馬中最後一馬,在34度的高溫下開操。

「世界上沒有醜陋的女人,只有懶惰的女人」(男人都係)!真,這些對自己有要求的同學,不但身形亮麗,他們都堅毅求進,散發著一股熱愛生命和自己的氣場,好charm。只要對自己有要求,你就美麗,你老婆會好愛MIRROR - 中的你!


孫立民 Watson Consultancy
孫立民 Watson Consultancy