《蜘蛛俠:不戰無歸》學習MJ的期望管理 | 文章 – 滙豐機滙

學習MJ的期望管理
管理  ·    ·  3 mins read

蜘蛛俠

“If you expect disappointment, then you can never be really disappointed.” Marvel電影《蜘蛛俠:不戰無歸》入面,蜘蛛俠嘅女朋友Michelle Jones (MJ) 就係以佢嘅呢一句「失望理論 (Disappointment Theory)」陪伴蜘蛛俠走過咗唔少嘅驚險經歷,將自己對事情嘅期望值拉低,令結果唔會比原本預期差,避免因為結果不能盡如人意而覺得失望。雖然預計失望的期望管理方式睇落好悲觀,但係其實都只係保護自己嘅其中一個方法。既然而家我哋唔可以入戲院睇戲,咁不妨試下從第二個角度睇下蜘蛛俠呢套電影啦!

蜘蛛俠MJ的失望理論:獎賞預期誤差 Reward Prediction Error

「失望理論」背後嘅原理正正係「獎賞預期偏差 (Reward Prediction Error)」,當事情嘅結果比預期差嘅時候,「負面預期誤差 (Negative Prediction Error)」會出現,觸發「獎勵系統 (Reward System)」,令體內嘅多巴胺水平下降,帶黎負面情緒。呢個生理反應正正解釋咗我地成日講嘅一句「期望愈大,失望越大」,當我哋期望會發生嘅嘢同現實嘅結果差距越大,對獎勵系統嘅刺激亦會越大,最後帶黎更大嘅負面情緒,亦都即係我哋所講嘅失望。換句話講,MJ嘅失望理論的確可以靠較低嘅期望,令現實更大機會同期望相同甚至比期望更好,當遇到比期望更好嘅情況時,仲可以收穫額外快樂。所以,MJ呢一個失望理論的確可以為佢同蜘蛛俠「今日唔知聽日事」嘅生活減少失望,或者真係可以令佢哋生活得更開心!


期望管理 Expectation Management

當我哋知道咗「獎賞預期誤差」對情緒嘅影響後,我哋又可以點樣透過「期望管理 (Expectation Management)」有效掌控我哋嘅情緒呢?就好似MJ嘅失望理論,我哋可以運用「期望管理」將我哋嘅期望定得較低,咁當現實比預期更好嘅時候,我哋就可以獲得更大滿足感,亦都可以因為更多意料之外嘅好事而收穫幸福感,令生活更多值得開心嘅事。與此同時,我哋亦都可以調整自己對過程同埋結果嘅睇法。當我哋喺過程中付出咗唔少嘅努力,但最後收穫翻黎嘅結果比預期差嘅時候,就好容易會因爲付出同收穫唔成正比,而覺得失望。因此,我哋亦都可以改變我哋嘅睇法,明白未知嘅結果由好多唔同因素影響,所以永遠喺我哋嘅掌控之外,而我哋可以做到嘅就係做好自己嘅本份。假如我哋已經盡咗全力做好自己能夠控制嘅部份,咁就算結果未有想像中咁好,我哋都始終可以為自己曾經付出嘅努力而感到滿足。只要我哋可以適當調整期望管理,自然就可以避免好多因為結果未如理想帶來嘅負面情緒!

想知道更多收穫心裡幸福感嘅方法?

閱讀更多:什麼是幸福?衡量心裡幸福感 (Psychological well-being) 的六大元素


期望值理論 Expectancy Theory


當對結果嘅期望可以影響我哋情緒嘅時候,其實佢同時都對事情嘅實行好重要,根據「期望值理論 (Expectancy Theory)」入面嘅公式:M (Motivation激勵力量) = V (Valence效價) * E (Expectancy期望值),期望值嘅大小對我哋完成事件嘅動力造成直接影響。當我哋嘅期望越高時,完成事件嘅動力亦會不自覺地提高。就好似《蜘蛛俠:不戰無歸》嘅最後一戰入面,MJ亦都放低咗佢嘅失望理論,反而鼓勵蜘蛛俠相信自己,對勝仗抱有更高期望,令蜘蛛俠有更大動力去竭盡全力戰爭。當我哋感覺對事情缺乏動力時,不妨都從效價同期望值兩方面研究下箇中原因,調整下自己嘅心態啦!

其實生活中好多事都受我哋本身嘅期望影響,而我哋嘅期望更會為我哋帶黎唔同嘅情緒,適當嘅調整甚至可以令我哋生活得更開心。假如我哋可以好似MJ咁適當調整自己嘅心態,做好期望管理,話唔定可以喺生活入面收穫到更多幸福感。唔知大家又睇咗《蜘蛛俠:不戰無歸》未呢?無論你睇咗呢套電影未,希望呢一篇文都可以俾到一個新嘅角度你去睇呢套電影啦!

更多文章、資訊歡迎follow我地嘅Facebook

上一篇文章:一場暫名為《試當真一週年現場版》的社會實驗


作者:phk

00後心理學系本科生


2Be Guru
2Be Guru
2BEGURU
2BEGURU