如果有得揀,請識嘅人嚟幫手定係請個街外人? | 文章 – 滙豐機滙

HSBC VisionGo X Office Daily 特約 : 如果有得揀,請識嘅人嚟幫手定係請個街外人?
管理  ·    ·  3 mins read

我朋友3年前創業,出招聘廣告請咗個Admin,有次公司要印小冊子,佢搵Admin去quote價,結果雜費一大堆,索價高達6位數。

朋友當時問:「會唔會太貴?搵出面嘅印刷公司或者Design House一條龍搞晒都平好多喎,我哋細公司啫。」

Admin:「出面啲印刷公司同Design House冇一間可信,又唔專業,好多都呃錢,呢班設計、排版、美術、影相、校對,仲有印刷,全部都係我嘅死黨,好pro㗎!」

「但係......校對係你本人?同埋呢,啲相我諗住買stock photo,應該唔使幾萬蚊搵人影啩。」

Admin:「係呀,校對係我,我以前做過,你煩少好多嘢,至於啲相點可以同photo agency買㗎,梗係搵專人影啦!」

朋友啞子吃黃蓮,因為佢明白下屬有「好嘢」當然想益自己班friend,但係食水會唔會太深呀?個Admin仲不斷踐踏其他人嘅專業,自己做校對又要另外收一萬蚊 。

「唔敢同人講,一陣個個以為我刻薄員工,但公司印嘢幫手對下錯別字,咁都要喺份糧以外再計?我個心真係有啲唔舒服,其實早排搵佢印卡片已經係咁,又係益佢自己friend,800蚊印100張卡片,個design根本係罐頭template,上去印刷公司個website都見到。」

嗰位Admin後來resign,新公司仲要係我朋友嘅競爭對手,聽講拎咗唔少公司資料過去,呢段經歷又真係幾嘔血,所以佢再請人就好堅持要搵熟人。

我:「其實熟人唔代表冇以上問題㗎喎!同埋如果太熟,甚至係親朋戚友,第日有咩拋撬都好煩㗎!」

若然公司愈做愈大,你好難只靠熟人同你打江山,而無論係街外人又好,認識嘅人都好,除咗工作能力同經驗之外,品格都一樣咁重要,但呢方面係需要時間了解同觀察。同樣地,莫道你在選擇人,人亦能選擇你,員工揀公司同揀老細都一樣。

個人認為開公司首先要訂立明確規矩,舉例幫公司印小冊子,有冇喺請人嗰陣講明係工作範圍內呢?可能嗰位Admin覺得要做額外嘢呢?另外,管理上可唔可以做到環環緊扣同埋互相監察?請返個會計,就會有人幫你睇實盤數,適當時候代你出口煞停一啲非必要支出。

正所謂活到老學到老,做生意開公司都係一樣,我創業都幾年喇,由無限公司轉為有限公司,直至今日都不斷遇到新問題,有啲完美拆彈,有啲處理得唔好,全部經一事長一智,同埋我學識咗諗唔通或者解決唔到嘅時候,要搵專業人士或者團隊協助,因為你踏出呢一步,隨時行少好多冤枉路。

實不相瞞,創業初期我都係請朋友同埋讀者幫我,因為佢哋了解我,我亦都認識佢哋,彼此知道大家要乜,就好似互相有對方嘅「說明書」一樣,但係隨住業務擴張,我而家係好open去請街外人,因為可以帶嚟新嘅元素。

 你呢?如果你開公司搞生意,會傾向聘用熟人,抑或出job ad向外求?大家一齊交流下吖。

立即閱讀更多有關人事管理的文章,請按此

聲明: 本文章中的內容由Office Daily提供。除非滙豐註明, 否則有關觀點不可視為來自滙豐的建議。滙豐概不負責文章中內容、質素、準確性、可靠性、及時性或完整性。滙豐概不就文章中的任何建議、意見或陳述而引致的任何損失或破壞承擔任何責任。文章中所發表的意見,可予修改而毋須另行通知,亦不可視為對個人的任何建議。
HSBC VisionGo
HSBC VisionGo