【Social Media移民潮:MeWe、Clubhouse知多少】 | 文章 – 滙豐機滙

相信即使係依家睇緊Facebook嘅你或者都開左MeWe啦? 唔知你又有冇被邀請加入Clubhouse呢? 呢兩個爆紅嘅新社交媒體究竟係咩嚟?有咩咁特別? 想做喺呢兩個平台做marketing又有咩需要注意嘅地方呢? Click入嚟等我哋Juicyapp話你知啦!
營銷  ·    ·  4 mins read

上次我哋講數碼營銷新趨勢嘅時候,第一項就係講新社交媒體嘅興起。自從Facebook等社交平台更改共享資訊條款之後,隨即引發起社交媒體移民潮,好多用家都開始放棄沿用多年嘅Facebook,改用MeWe。同時,最近又再多一個全新嘅社交平台ClubHouse興起,佢嘅特別之處係用戶需要受到邀請先可以開始使用,唔知大家又有冇被邀請加入呢?今次我哋會集中介紹上述兩個平台,同埋講吓有咩值得一班市場營銷人員(marketers)留意。

咩係MeWe?點解咁多人轉會用MeWe?

MeWe自稱係一個注重用戶私隱嘅社交平台,佢同Facebook 最大嘅分別就係佢冇嚴厲嘅內容審查,MeWe主打冇廣告、唔會記錄用戶觀看內容同埋唔會洩露用戶資料俾第三方。近日移民潮嘅出現主要源於Whatsapp係2月8日宣佈改變私隱條例,強制用戶要向Facebook共享資訊,引起好多用戶不滿並希望另闢蹊徑,喺一個私隱得到保障嘅平台去社交。

MeWe有咩特點?

就應用程式嘅功能嚟講,MeWe有比較多群組分類,而且分類比較清晰明確。雖然 Facebook都一樣有群組功能,但大部分都係非公開群組,用戶如果想加入就需要得到群組管理員嘅准許。喺MeWe,群組亦有分公開同私人兩種,顯示有「join」就代表佢係一個公開嘅群組,用家無需通過審批都可以自由加入;而希望加入後者就要撳「apply」啦,要加入就可能就要回答群主嘅問題,經過佢嘅批准先可以加入。

另外,MeWe唔會強制用戶睇任何內容,用戶可以自行選擇觀看聯絡人、社群、專頁嘅內容,亦可以同時睇哂三種內容,用戶有更多選擇權,可以集中地接收訊息。另一個值得一提嘅特點就係MeWe包含錄音功能,當用家想出帖子或者留言回覆嘅時候,都可以錄音代替文字,而用法同Whatsapp語音訊息一樣,非常方便。

係MeWe上做marketing要注意嘅事項

MeWe同我哋市場營銷人員用開嘅Facebook可以話係南轅北轍,兩者有好多嘅不同之處。當中最顯著嘅一點就係內容方面,Facebook會透過演算法令到不同品牌嘅內容更容易接觸目標受眾,而MeWe則係被動地按時間先後次序去顯示內容,因為MeWe主打無廣告,即使係MeWe到做品牌推廣,呢類資訊都好容易會被忽略。

然而,MeWe係發佈帖子入面具備投票功能,最多可以加入20個選項,亦都可以埋加入表情符號(Emoji)或者圖片,呢個功能有助公司進行投票活動去加強同客戶嘅互動率,市場營銷人員亦可以問一啲有關顧客喜好嘅問題去更深入了解佢哋。假設你經營嘅係化妝品牌,就可以問大家對新推出嘅產品有咩意見,例如係今季嘅唇膏顏色會令佢哋聯想到啲咩咁,從而可以得知廣告活動等嘅設計應該用咩主題。好好利用呢個功能就可以喺做內客營銷嘅時侯,同時做埋市場調查,一舉兩得。

咩係Clubhouse?點解Clubhouse咁吸引同多人使用?

Clubhouse係一個以語音聊天嘅應用程式,自2020年4月推出至今有近二百萬嘅活躍用戶。呢個應用程式開始普及嘅主要係因為名人效應,因為Tesla嘅老閭馬斯克(Elon Musk)都有使用,好多想同佢喺Clubhouse入面傾計,帶動好多人下載試玩。

簡單嚟講,Clubhouse可以話係一個網絡版嘅城市論壇,可以俾多位用家用語音交流。同大家熟識嘅Instagram嘅直播(live)功能比較的話,Instagram嘅live可以直播畫面同語音,但最多只可以俾兩位用戶同時發言,觀眾只可以用文字去回應;而Clubhouse雖然冇得露樣,但可以俾多位與會者一齊發言,係交流嘅層面嚟講較有優勢。唯一嘅缺點就係佢現時只係開放俾IOS用戶下載。

咁到底Clubhouse有咩咁特別呢?冇錯,就係頭先我哋提及嘅邀請碼啦。每個人開設帳戶之後都只有兩個邀請碼,如果你Clubhouse非常活躍,先會有額外嘅邀請名額,就係呢個物以罕為貴嘅概念吸引左唔少人嘅興趣啦。

係Clubhouse上做marketing要注意嘅事項

我哋上次講過影響者行銷(influencer marketing)會變得日益重要,其實Clubhouse為網絡紅人提供左另一個平台去做品牌宣傳。以foodpanda為例,喺過去嘅農曆新年,佢哋就邀請咗幾位唔同嘅藝人嘉賓喺Clubhouse同各位foodpanda嘅品牌關注者傾下計。喺Clubhouse傾計比起硬銷易入口好多,所以確實係一個俾KOL(Key Opinion Leader)進行品牌推廣嘅新興渠道嚟架。

除左傾計之外,Clubhouse當然有更大嘅作用啦。有唔少行業領袖都選擇喺Clubhose分享有關自己行業嘅資訊,背後嘅原因就好似我哋做內容營銷(content marketing)一樣,可以建立一個專業形象,同時拉近自己同潛在客戶嘅距離,有需要時仲可以向觀眾推廣資訊添。特別喺Clubhouse,實時、直接嘅對話親切感更高,好似係我哋見到Elon Musk等大人物都願意花時間同我哋溝通咁,可以令品牌比人一種親民嘅感覺。

講到呢到,其實如果各位marketers希望同同行交流,Clubhouse亦都係一個好適合嘅平台嚟架,有好多唔同嘅marketers經常喺入面不定期同行內人士就各種行銷嘅相關議題進行討論架。最近亦興起一種新玩法。用戶會開設一啲「無聲房」,喺入面大家都默不作聲,旨在俾會議內嘅人互相睇下大家嘅照片同簡介,類似交換卡片咁,希望睇吓日後有冇合作嘅機會。

就咁睇MeWe同Clubhouse雖然都係新興嘅社交媒體,但係兩者嘅用戶都唔少,唔同大小嘅公司都開始係呢兩個平台開設專頁同埋進行品牌推廣活動,所以作為市場行銷專員嘅你絕對唔可以忽略呢啲新社交媒體嘅宣傳策略啦!

JUICYAPP LIMITED
JUICYAPP LIMITED