佛系定無為 | 文章 – 滙豐機滙

少做少錯,即唔做唔錯,對外對內不如索性都行「佛系」路線?而「佛系」就係不出手,咁同好似hea做嘅「無為而治」又有咩分別?

管理  ·    ·  2 mins read

喺做得多錯得多的社會大環境下,企業老闆或主管應該點做好呢,少做少錯,即唔做唔錯,對外對內不如索性都行「佛系」路線?而「佛系」就係不出手,咁同好似hea做嘅「無為而治」又有咩分別?

簡單嚟講,「佛系」標榜「緣份到了,自然有結果」就係等運到,心態打定輸數,求贏可喜求敗不可恥;老子提倡的「無為」,係為左達到效果,而刻意減少出手干預,目標係求贏。

如果純粹一個人的事,點樣做決定,真係問題不大,但一個人的決定係關乎好多人,就只能存「佛心」慈悲心,千祈唔好「佛系」,否則累人累物。

好似幾個月前,新冠肺炎最初傳到英國,英揆約翰遜最初推行所謂措施,根本等同咩都唔做,表面睇嚟係「物競天擇」、「順其自然」,實際上似係想咩到唔做嘅情形多啲,不顧人命真要不得。

至於「無為」,概念係源自春秋末期道家老子《道德經》,當中第三十八章提及:「道常無為而無不為。侯王若能守之,萬物將自化。」意思就係最高力量係順應萬物本性運作,唔駛點出手萬物都茁壯成長,君王如果順應萬物本性施政,就可化育成才。

後來呢種觀念經法家提煉,引生成政治權術,到需要休養生息嘅漢初成為「黃老之術」,應用在管治上就是「無為而治」,重點就係培養同保護社會活力,等社會自然發展,所以政策係不擾民、不勞民同減輕人民租稅負擔。

如果「無為而治」放喺現代商界管理,就係管理層好似消失咁,下屬依然自發努力工作。

喺香港,提倡「無為而治」嘅例子,相信大家都會諗起施永青先生。佢過往主張「無為而治」,盡量等下屬自由發揮,從而得出最好的效果。

最近,我同施先生有一次對談機會,佢講及佢推行嘅「無為而治」,係要根據大環境嚟操作,所以佢重申,「無為」喺三種情況下需要轉成「有為」,就係:公司創業初期、在前線銷售及處於逆境之時,因為係多一分投入,多一分力量去協助扭轉局勢,否則就係要捱打。

所以,處於艱難時候就要相對有為。

「 沿桌有角 」 專欄 

圖片來源: Pieter on Unsplash 

theDesk 每逢星期四將會邀請商界的星級嘉賓分享及討論香港各行各業如何 ‘Don’t waste the crisis, build a better Hong Kong’,按此了解更多。 



theDesk
theDesk