商人與儒商 不僅一字之別 | 文章 – 滙豐機滙

資本主義成為世界主流,社會重視商人,因為商業本身創造價值,令社會繁榮,但亦因為咁,又發展成以個人財富多寡變為成功指標,呢種心態下,慢慢出現不同問題。

視野  ·    ·  2 mins read

社會近年怨氣重,「從商」有時變咗「從政」一樣,易招非議,有人亦會攞「從前」嚟對比,覺得以前嘅人有人情味,做生意唔會賺咁盡。

我認同。不過我亦諗,就係大家提及嘅「舊時」,究竟係幾耐以前?我細細個,已經聽老人家講佢細細個聽過老人家講「無奸不成商」。

古代中國以農立國,農戶生活固定,便於抽稅管治,同流動性大嘅商人截然不同,所以統治者會壓住商人個勢,例子有戰國後期秦國推行「重農抑商」、漢高祖劉邦頒佈「賤商令」。

至於平民百姓,佢哋見到商人不事生產四圍走,將物件「低買入高賣出」,賺取中間差價,相比農樵漁夫鐵匠,顯得「狡猾」。

近代人歸納歷史發展,睇出商業資本係依靠消費要求而發展。古代中國商業資本未有高度發展,就同消費者態度有關。中國傳統思想認為,人唔應該放縱自己去享受,經濟生活限於應付自然需要,社會上做到「足」和「均」已屬理想。

而當時中國商人,由於亦在儒道思想氛圍中長大,所以認為商業成功要靠「貨真價實」,而光宗耀祖的事係對社會有所奉獻並發生作用。

於是,中國到明朝清朝,商人會憑「捐納」獲官位,既報效朝廷亦可與文化人物打交道,務求洗去「向錢看」的形象。而各地出現不同商幫,當中品德好、有文化同熱心公益,並具營商才幹之人,就有「儒商」之稱。

到咗近代,資本主義成為世界主流,社會重視商人,因為商業本身創造價值,令社會繁榮,但亦因為咁,又發展成以個人財富多寡變為成功指標,呢種心態下,慢慢出現不同問題。

幸而,世界各地陸續有人站出來,希望縮減貧富懸殊、保護環境,令社會最底層嘅人活得有尊嚴等等。

香港「社企之父」魏華星(Francis),由過往培育各種新社企,融入營商技巧,「賺錢」與「慈善」並行,近年改變策略,走向源頭向商界提倡理念,推廣「business2.0」,令投資者獲得回報之餘,亦能改善社會。

最近喺我哋對談中,佢提及:「社會近年已經冇儒商」、「若要改變社會,唔商界都必須有新思維。」另外,佢亦分享做緊嘅project內容成果,同埋制訂一個香港2030願景。

我相信,當商界越來越多人想改變,想回饋社會,「儒商」風氣會重現。

「 沿桌有角 」 專欄
圖片來源:
Razvan Chisu, Unsplash

theDesk
theDesk